Ubunifu ulivyo Changia Ufaulu wa Wanafunzi Darasa la Saba

Table of Contents

Ubunifu ulivyo Changia Ufaulu wa Wanafunzi Darasa la Saba

Kuna msemo wa Kiswahili usemao ‘kitu ukikipenda utakifanya kwa moyo na kutamani kupata matokeo chanya katika kile unachokifanya.’ Kauli hii inadhihirika kwa Mwalimu Yusuph Pangoma wa Shule ya Msingi Ikorongo, mkoani Mara, ambaye kupitia ubunifu na kujitolea, ameweza kusaidia wanafunzi wake kufikia mafanikio makubwa katika mitihani yao ya darasa la saba.

Pangoma aliwapokea wanafunzi hao wakiwa na uwezo mdogo wa kusoma na kuandika, lakini kupitia safari yenye changamoto, alijenga njia za kipekee ambazo zimeleta matokeo chanya.

Ubunifu ulivyo Changia Ufaulu wa Wanafunzi Darasa la Saba

Kuanzisha Ubunifu na Mbinu Mbadala za Kifundishaji

Mwalimu Pangoma alielewa kwamba changamoto kubwa iliyowakabili wanafunzi wake ilikuwa ni uoga na ukosefu wa hamasa ya kujifunza. Ili kufanikiwa, alitumia mbinu mbadala za ufundishaji zilizojumuisha muziki, michezo, na zana za kujifunzia.

Alijenga uhusiano wa karibu na wanafunzi wake, akiwafanya wajione kuwa na thamani darasani. Kwa mfano, aliwafundisha kupitia nyimbo na sarakasi, mbinu ambazo zimewasaidia wanafunzi si tu kujifunza haraka bali pia kupenda masomo.

Kwa kutumia njia hizi za kiubunifu, aliweza kurudisha ari ya kujifunza kwa wanafunzi wengi ambao walikuwa wamekata tamaa. Aligundua kwamba kujifunza kwa burudani na kuingiza michezo katika masomo kuliwasaidia wanafunzi kupata uelewa wa masomo kwa urahisi.

Mbinu hii imekuwa na mchango mkubwa katika kuondoa hofu ya masomo na kuwafanya wanafunzi kuwa na uhuru wa kuuliza maswali na kujifunza kwa uhuru zaidi.

Ushirikiano na Walimu Wenzake

Pangoma hakufanya kazi peke yake; alishirikiana na walimu wenzake waliokuwa na malengo sawa ya kuboresha elimu kwa wanafunzi wao. Kwa pamoja, walipanga mikakati ya kuwapa wanafunzi motisha zaidi kupitia zawadi mbalimbali kwa wale waliokuwa wakifanya vizuri katika mitihani. Zawadi hizo ni pamoja na soda, mavazi, na mara nyingine hata kuwachinjia kuku kama sehemu ya sherehe za kutambua juhudi za wanafunzi wao. Motisha hizi zimewaongezea wanafunzi hamasa kubwa na kuwafanya wajitahidi zaidi katika masomo yao.

Kuondoa Vikwazo vya Kiuchumi kwa Kutoa Msaada wa Vifaa vya Shule

Changamoto nyingine iliyokuwa ikiwakabili wanafunzi wa Pangoma ni ukosefu wa vifaa vya kujifunzia kutokana na familia zao kuwa na hali duni kiuchumi. Wanafunzi wengi walikuwa wakihudhuria shule wakiwa na mavazi yaliyotatuka na bila viatu, hali iliyowaathiri kisaikolojia.

Ili kutatua changamoto hii, Pangoma alitumia mtandao wa kijamii wa Instagram kuhamasisha watu kuchangia mavazi, madaftari, viatu, na vifaa vingine muhimu kwa ajili ya wanafunzi wake. Ushiriki wa jamii umekuwa msaada mkubwa kwa shule hiyo, na umeboresha hali ya wanafunzi darasani, wakijiona kuwa na hadhi sawa na wenzao na hivyo kuwa huru katika kujifunza.

Pia, Pangoma ameweza kupanua msaada kwa familia nyingine za kijijini kwa kuchangisha fedha kwa ajili ya matibabu, chakula, na mahitaji mengine muhimu. Mchango huu wa Pangoma umekuwa muhimu si tu kwa wanafunzi bali pia kwa jamii nzima inayomzunguka.

Matokeo Chanya ya Kifundishaji: Kuongoza Katika Ukanda wa Ngoreme

Matunda ya jitihada hizi za kipekee za Mwalimu Pangoma ni makubwa. Shule ya Msingi Ikorongo imekuwa ya kwanza kwa ufaulu katika ukanda wa Ngoreme, ikiwapiku shule nyingine 17 zilizopo katika eneo hilo.

Wanafunzi saba waliweza kufaulu kwa kupata daraja la juu la alama A, huku wanafunzi wengine wakipata daraja B na C. Kiwango hiki cha ufaulu kimevutia wengi, huku baadhi ya wanafunzi wakifanikiwa kuchaguliwa kujiunga na shule za vipaji maalumu, hatua inayoashiria mafanikio makubwa kwa shule na jamii.

Maono ya Baadaye: Kuwa Kiongozi na Mhamasishaji wa Walimu

Katika miaka mitano ijayo, Pangoma anaona malengo yake yakipanuka zaidi, akilenga kuwa mwezeshaji kwa walimu wengine. Anataka kuwa sehemu ya mabadiliko makubwa katika sekta ya elimu kwa kushirikisha mbinu zake za kufundisha ambazo zinalenga kuimarisha mahusiano kati ya walimu na wanafunzi. Kwa kuwa kiongozi na mhamasishaji, anaamini kwamba anaweza kusaidia walimu wengi kuona umuhimu wa kubadilisha mtazamo wa ufundishaji kwa njia zinazozingatia upendo na hamasa.

Pangoma anapania pia kuanzisha taasisi itakayotoa msaada wa vifaa vya shule kwa wanafunzi wenye uhitaji, ikiwemo sare za shule, vitabu, na zana za kujifunzia. Hii itasaidia wanafunzi wengi kufurahia masomo yao bila kujali changamoto za kifedha zinazowakabili familia zao.

Mapendekezo ya Mhariri: